Nazir: "Məktəbəhazırlığın hamı üçün əlçatan olması üzrə işlər gedir"

 "Müəllimlərin peşə keyfiyyətlərinin artırılmasına, zəruri inkişafyönümlü metodikalar və təlim texnologiyalarını çatdırmağa imkan verən mexanizmlər tətbiq olunmağa başlanıb”.

 

Bunu təhsil naziri Mikayıl Cabbarov deyib.

M.Cabbarov qeyd edib ki, bu məqsədlə Bakı Pedaqoji Kadrların İxtisasartırma və Yenidən Hazırlanma İnstitutunun bazasında Nazirlər Kabinetinin müvafiq qərarına əsasən təhsil İşçilərinin  Peşəkar İnkişafı İnstitutu yaradılıb. Bu qurum  kredit sisteminə əsaslanaraq bütün kateqoriyadan olan təhsil işçilərinin peşəkar inkişafı ilə əlaqədar olan siyasətin müəyyənləşdirilməsi, təlimlərin təşkili və koordinasiya ilə məşğul olacaq.

 

Bu sahədə Təhsil Problemləri İnstitutunun da üzərinə yeni vəzifələr düşür. Hazırda bu qurumun yeni inkişaf modeli üzərində iş gedir.

 

Nazir deyib ki, təhsil sistemində tətbiq edilən yeniliklərdən biri də pilot olaraq seçilmiş 58 məktəbdə 176 təmayül sinfinin açılmasıdır. Nazirin sözlərinə görə, bu məktəblərdə oxuyan şagirdlərə qeyri-profil fənlərin dərs saatlarının azalması sayəsində seçdikləri istiqamət üzrə daha dərin biliklər verilir. Bu islahatın məqsədi ümumi təhsilin keyfiyyətini yüksəltmək, şagirdlərə seçdikləri ixtisas istiqaməti üzrə daha keyfiyyətli kompitensiyalara yiyələnmək imkanı yaratmaqdır. Bununla əlaqədar tədris resurslarının hazırlanması və təmayüllər üzrə təhsilin əhatə dairəsinin genişləndirilməsi qarşıda duran vəzifələrdəndir.

 

"Məktəbəhazırlıq pilləsinin 2016-2017-ci ildən dövlət büdcəsindən maliyyələşməsi və hamı üçün əlçatan olması istiqamətində işlər davam etdirilir. Məqsəd 2020-ci ilə kimi ölkədə uşaqların məktəbəqədər təhsil səviyyəsinə əhatəsini 70%-ə çatdırılmasıdır”, -deyə nazir əlavə edib.